Parental Responsibility Code sa Cugman mapatuman na

MAHATAGAN na sa hingpit nga proteksyon ug pag-amoma ang mga kabataan sa barangay Cugman ning syudad.

Kini human ang konseho sa sesyon niadtong Lunes nga gidumala ni Bise Mayor Kikang Uy mipalabang sa ordinansa nga nagpatuman sa Parental Responsibility Code.

Tumong sa maong balaod nga maprotektahan ang interest sa kabataan pinaagi sa mga lakang pagsigurong ma-obserbar ang international standard sa katungod ug proteksyon sa kabataan.

Sa maong ordinansa, nahilatid ang responsibilidad sa mga ginikanan bisan niadtong mga ginikanan nga nagkabulag ingon man ang mga personalidad mahimong moatiman sa kabataan kon ugaling wala na ang ginikanan.

Dugtong niini, nahilatid usab sa maong ordinansa ang mga tulubagon sa mga ginikanan ngadto sa ilang mga anak ug uban pang mga gidili ubos sa maong balaod.

Ang resolusyon nga gipalabang sa konseho alang sa maong katuyoan gipaluyohan sa komite sa Barangay Affairs ni Konsehal Yan Lam Lim ug komite sa pamalaod ug reglamento ubos ni Konsehal Ian Mark Nacaya.