Panubig sa Indahag mapalambo pa

ANG konseho sa syudad ubos ni bise mayor Kikang Uy padayon nga nangita sa mga gikinahanglang lakang aron matubag ang panginahanglanon sa katawhan.

Sa sesyon kagahapong adlawa, hiniusang girekomendar sa konseho ang aplikasyon sa JE Hydro & Bio-Energy Corporation alang sa pag-develop, pagtukod ug pagmintinar sa Level 3 Water Supply ug Distribution System dinha sa barangay Indahag.

Ang maong kompanya mitanyag sa pag-supply ug distribute sa limpyo ug mainom nga tubig ngadto sa tanang molopyo sa barangay.

Gibutyag nga ang JE Hydro adunay kapasidad nga motukod og bulk water plants, water distribution operations ug wastewater treatment plants.

Gilantaw nga sa serbisyo sa kompanya matubag na ang dakong kakulangon sa panubig sa barangay ug magdala usab og dugang imbestor nga mobubo sa ilang mga patigayon ngadto sa Indahag.

Ang resolosyon nga gisagop sa konseho alang sa maong katuyuan nunot usab sa gipalabang nga ordinansa sa barangay Indahag nga nagtugot sa operasyon sa water supply system sa pribadong kompanya.

Ang resolosyon nga gisagop sa konseho gipaluyohan sa komite sa public utilities ni konsehal Bong Lao ug komite sa pamalaod ni konsehal Ian Mark Nacaya.