Pangandam sa epekto sa El Niño padayong gitun-an

Padayong gitun-an sa komite sa Climate Change, Adaptation and Mitigation and Disaster Risk Reduction ni Konsehal Bernie Esparcia ang DILG MC No. 2023-65 kon Mitigation and Preparedness Measures for the El Niño Phenomenon 2023 sa tinguha nga mapagaan ug makapangandam ang matag lokal nga kagamhanan sa maong phenomenon.

Atol sa milabayng tigom sa komite, ang representante sa City Legal Office mibutyag nga sa kasamtangan si Mayor Klarex Uy mipagawas na og Executive Order (EO) No. 122-2023 nga nagmugna sa Technical Working Group (TWG) agig pagsunod sa giluwatang DILG memorandum.

Kini gipangulohan sa mayor ug ni City Agriculturist Paterno Gonzalez, Jr., isip co-chair ug gilangkoban sa kadagkoan ug representante gikan sa CDRRMD, City Planning and Development Office, City Information Office, CSWD, City Health Office, City Veterinary, CLENRO, CHUDD, City Legal Office, COWD, Xavier University og USTP.

Niini, gipaabot sa komite nga maimbitar sa tigom ang maong TWG aron makuha ang ilang panahom kabahin sa pagahimoong mga lakang o interbensyon nga makatabang sa pagpangandam ug matubag ang dili maayong epekto sa maong phenomenon.