Panagtambayayong sa pagpatuman sa ALS-NSP aprobado sa konseho

GILANTAW ang pagsaka sa gidaghanon sa mga out-of school youth (OSY) ug adults-at-risk dinhi sa Dakbayan sa Cagayan de Oro nga makatagamtam sa maayong oportunidad ug makahuman sa pormal nga batakang edukasyon.

Kini human ang Konseho sa Syudad atol sa regular sesyon sa Lunes nga gidumala ni City Vice Mayor Bebot Rodriguez mipalabang og managlahi nga ordinansa nga naghatag katungod ni City Mayor Klarex Uy pagpirma sa Memorandum of Agreement (MOA) tali sa Capitol University (CU), nga girepresentahan ni University President, Atty. Casimiro B. Juarez, Jr., PHINMA Cagayan de Oro College (PHINMA-COC), nga girepresentahan ni Chief Operations Officer, Mr. Mark C. Macaventa ug Department of Education-Division of Cagayan de Oro (DepEd-CDO), nga girepresentahan ni Schools Division Superintendent, Dr. Roy Angelo E. Gazo, CESO V.

Kini naglangkob sa panagtambayayong sa pagpatuman sa Alternative Learning System-Night School Program (ALS-NSP) alang sa out-of-school youth (OSY) ug adults-at-risk sa syudad.

Giisip nga ang OSY ug ang adults-at-risk mao ang mga vulnerable nga grupo nga gikinahanglang mahatagan sa kahigayonan sama sa batakang edukasyon, literacy, numeracy ug values formation nga makapahimo kanila nga kabahin sa malungtarong kaugmaran.

Kini nga kolaborasyon nahiuyon sa RISE agenda sa kagamhanan sa siyudad, nga nagtumbok sa edukasyon isip usa ka mahinungdanong himan alang sa kalamboan sa matag usa.