Panagsabot dihas pagpatuman sa proyekto sa DPWH gihingusgan

Gihingusgan sa komite sa public works ni Konsehal John Michael Seno nga mapahigayon ang coordination meeting sa tanang apektadong partido dinha sa pagpatuman sa Deparment of Public Works and Highways (DPWH) sa ilang proyekto pag-upgrade sa drainage structure gikan sa Corrales Extension paingon sa Port Road Corrales Extension.

Kini human si Engr. Nonito Oclarit sa Roads and Traffic Administration (RTA) mihangyo nga mapahigayon ang panagtigom aron makuha ang panahom sa tanang posibleng maapektohan sa pagpatuman sa proyekto ilabina gayud diha sa dalan Abellanosa sa Barangay Consolacion.

Gibutyag ni Oclarit nga adunay mga bodega sa maong dapit nga maapektohan kun ipatuman na ang proyekto kay walay laing mahimong access road gawas sa dalan Abellanosa.

Gipasabot ni Seno nga kinahanglan nga malingkoran kini sa tanan aron makakab-ot ang solusyon nga uyon ang tanan.

Nasabtan nako ang kamahinungdanon sa proyekto apan dili na masabtan sa tawo ilabina kun ilang masinati ang kapiot nga dagan sa trapiko.

Niini, gihangyo ni Seno nga imbitahon ang tanang partido ingon man mga opisyal sa barangay Consolacion ug ang komite atol sa maong coordination meeting aron makapadayag sa tagsa tagsa ka panahom ug opinyon.