Panaghiusa tali sa mga sakop sa konseho gitinguha

ATONG paninguhaon nga maghiusa ang tanang sakop sa konseho ug likayan ang panagbingkil.

Kini ang gipadayag ni Bise Mayor Bebot Rodriguez atol sa pakighinabi kaniya sa usa ka radio station human gikumusta sa tukmang kahimtang sa konseho sa syudad.

Iyang gibutyag nga hapsay ug malinawon ang dagan sa konseho tungod kay nagpatigbabaw ang pagrespeto sa usa’g usa ug gani bisan walay komite nga gihawiran ang pipila ka sakop sa minorya iya kining gihangyo nga motambong gayud sa mga tigom sa lain laing komite diin mainiton usab silang gidawat.

Niini, mapasalamaton ang bise mayor sa gipakitang panaghiusa sa tanan ug nanghinaot nga unta magpadayon kini aron hingpit nga maalagaran ang katawhan.

Tanan pareho lang, patas ang akong pagtagad sa tanan tungod kay gusto nako mahatagan sa kahigayonan nga maka-istorya ilabina niadtong maoy sponsor sa mga pagahisgutan sa konseho, pamahayag ni Bise Mayor Rodriguez.