Panagbangi tali’s Higaonon Tribal Council, kapitan sa Dansolihon nasulbad

NAHATAGAN na sa kasulbaran ang panagbangi tali sa Higaonon Tribal Council of Nahiliran Ancestral Domain ug lokal nga kagamhanan sa Barangay Dansolihon.

Kini human ang konseho sa syudad sa sesyon niadtong Lunes, nga gidumala ni Bise Mayor Bebot Rodriguez, misagop sa resolosyon nga giluwatan sa Komite sa Ethics and Blue Ribbon nga nagbasura sa gipasakang sumbong ni Roberto Cabaring kon Datu Makilala sa Higaonon Tribal Council batok ni Kapitan Franco R. Montano sa Dansolihon.

Nasayran nga ang duha ka partido nagkasabot nga resolbahon sa ilang kaugalingon, sa pag-abag sa National Commission on Indigenous People (NCIP), ang panagbangi sa tinguha nga mamintinar ang kalinaw ug kahusay sa dapit ug mapalapdan ang mga lakang pagproteher sa katungod sa matag molopyo sa komunidad.

Mahinumduman nga si Cabaring mipasaka og kaso batok ni Kapitan Montano tungod matod pa sa nahimong kalapasan sa probisyon sa RA 8371 kon Indigenous People’s Rights Act (IPRA).

Ang resolosyon nga giluwatan sa Komite sa Ethics gipirmahan nila ni Konsehal Edgar Cabanlas, Jose Pepe Abbu Jr., Roger Abaday, Romeo Calizo ug Girlie Balaba.