Pamilya dako’g papel mahunong mga kaso sa paghikog - Esparcia

“LET’S go back to the family.”

Mao kini ang panawagan ni Konsehal Bernie Esparcia, atol sa sesyon sa konseho niadtong Lunes nga gidumala ni Bise Mayor Bebot Rodriguez, agig reaksyon sa special report ni Konsehal James Judith II kalabot sa sunod sunod nga mga kaso sa paghikog dinha sa pipila ka tulay sa syudad.

Sa maong higayon, iyang gipasabot nga kini posibleng epekto sa pandemya diin daghan ang gihunahuna sa mga ginikanan hinungdan nga nawala ang pagbantay sa ilang mga anak. Dako ang iyang pagtoo nga adunay papel ang pamilya aron mapakgang ang pagsuway og paghikog sa mga sakop sa pamilya.

"It’s about time for one big campaign", pamahayag ni Esparcia.

Niini, siya nanawagan sa tanang sektor sa katilingban gikan sa barangay, tunghaan, employers, government offices ug simbahan alang sa hiniusang mensahe nga balikan ang pamilya ug kumustahon ang matag sakop sa pamilya.