Pamalihi reloc site makutayan og linya sa kuryente

Hayan matagamtam na sa mga molopyo sa Resettlement Project-2 Pamalihi Relocation Site sa barangay Pagatpat ang ilang gipangandoy nga makutayan og linya sa kuryente ang maong dapit.

Kini human giuyunan sa konseho sa syudad sa sesyon niadtong Lunes nga gidumala ni Bise Mayor Jocelyn “Bebot” Rodriguez ang ordinansa nga naghatag og katungod ni Mayor Rolando “Klarex” Uy pagpirma sa Memorandum of Agreement (Moa) tali sa Misamis Oriental Rural Electric Service Coop Inc. (MORESCO-1) nga naglangkob sa proyekto pagkutay og linya sa kuryente ngadto sa nahisgotang dapit.

Ubos sa MoA, gipasabot nga ang MORESCO-1 magtukod og extension sa single phase line aron maserbisyohan ang mga molpyo sa dapit. Kini nga proyekto mobalor og P860,226.90.

Lakip sa mga nalatid nga palisiya ubos sa MoA mao nga ang konsumedor/benepisaryo motuman sa gihan-ay nga mga rekisitos nga naglangkob sa bill deposit, membership fee, installation fee ug uban pang incidental expenses.

Ang giuyunang MoA naglatid sa tagsa-tagsa ka responsibilidad sa matag partido sa tinguha nga masilbihan ang katawhan sa syudad.

Ang ordinansa nga gipalabang sa konseho alang sa maong katuyuan gipaluyuhan sa komite sa Urban and Rural Poor and Housing Development ni Ko0 ug komite sa pamalaod ni Konsehal Ian Mark Nacaya.