Pakiglambigit sa mga brgy dakong tabang pagpatuman sa Traffic Code

“DAKONG tabang ang pagpakiglambigit sa kabarangayan aron hingpit nga mapatuman ang Traffic Code ug mapagaan ang problema sa trapiko sa syudad.”

Mao kini ang pamahayag ni Konsehal Roger Abaday, chairman sa Komite sa Environment sa special report ni Konsehal James Judith, atol sa sesyon sa Konseho niadtong Lunes nga gidumala ni Bise Mayor Bebot Rodriguez kalabot sa gikatahong pagbutang og mga karatola nga ‘reserved parking’ dinha sa kadalanan nga nakadugang sa kapiot sa dagan sa trapiko.

Sumala ni Abaday nga dayag sa probisyon sa R.A. 4136 nga gidili ang pag double parking sa tanang national roads ug gitugotan lamang ang parking sa pipila ka gitumbok nga dapit.

“Gani, adunay memorandum ang ahensya sa Department of Interior and Local Government nga kinahanglang limpyo ang kadalanan sa bisan unsang makababag sa mga motorist,” dugang sa konsehal.

Niini, iyang gidayeg ang taho ni Judith tungod kay ang mga nakababag sa dalan nagpabilin nga problema sa trapiko sa syudad dala ang paglaum nga pinaagi sa maong taho masunod ang balaod alang sa kaayuhan sa tanan.

Matod niya nga dako ang papel sa mga barangay dinha sa pagpatuman sa balaod aron maangkon ang hapsay nga dagan sa trapiko.

Ang gisugyot gipaabot tun-an sa Komite sa Public Utilities ni Konsehal Romeo Calizo ug Komite sa Barangay Affairs ni Konsehal Yan Lam Lim alang sa tukmang aksyon ug rekomendasyon.