Pagtuon sa rapid bus transit sa CDO gilantaw

DAMGO ug usa sa gitinguha sa gobyerno lokal nga mahimong metropolitan ang syudad sa Cagayan de Oro ug kasikbit nga mga probinsya ug munisipyo.

Lakip sa maong damgo ang pagpalambo sa bus rapid transit (BRT) system hinungdan nga nagsulat ug naghangyo ang kagamhanang lokal sa Department of Transportation (DoTr) nga matabangan sa plano duha ka tuig na ang milabay.

Mao kini ang pamahayag ni Konsehal Edgar Cabanlas, chairman sa komite sa urban and rural poor and housing development, sa sesyon sa Konseho niadtong Lunes nga gidumala ni Bise Mayor Kikang Uy, human nadawat ang mensahe gikan sa road sector

sa DOTr nga nagpahibalong interesado ang Swedish Government motuki sa maong hangyo.

Matod ni Cabanlas nga angayan pahimuslan ang kahigayonan kay susama kini sa JICA o USAID nga walay gasto ang gobyerno lokal sa pagpahigayon sa feasibility study busa angayan kining sugdan kay maabtan paman kini sa pipila ka tuig aron mapatuman tungod sa daghan pang gikinahanlan.

Niini, iyang gisugyot ang pagmugna sa technical working group nga tahasan sa exploratory talks tali sa Swedish Government alang sa pagpahigayon sa pagtuon sa bus rapid transit system.

Ang taho ni Cabanlas giduso ni Bise Mayor Kikang Uy ngadto sa komite sa Planning and Development ni Konsehal Ian Mark Nacaya alang sa pagtuon ug rekomendasyon.