Pagtuon sa methane gas, organic fertilizer recovery dihas city slaughterhouse ipahigayon

PABORABLENG giuyonan sa konseho sa syudad ubos ni Bise Mayor Kikang Uy ang laraw pagtuon og mga pamaagi nga mapuslan ang waste water dinha sa City Slaughterhouse sa tinguha nga maprotektahan ang kinaiyahan.

Sa sesyon niadtong Lunes, gipalabang ang ordinansa nga naghatag og katungod ni Mayor Oscar Moreno pagpirma sa Memorandum of Agreement (MoA) tali sa University of Science and Technology of Southern Philippines (USTP) ug Mega Integrated Agro Livestock Farm Corporation (Mega Farm) nga naglangkob sa pagtuon kalabot sa Methane Gas and Organic Fertilizer Recovery as Waste Water Improvement Strategy dinha sa City Slaughterhouse Facility sa barangay Cugman.

Si Konsehal Ian Mark Nacaya, chairman sa komite sa economic enterprises ug napaluyo sa gipalabang nga ordinansa, mibutyag nga importante ang maong panagtambayayong tungod kay ang pagtuon magtinguha nga mapangitaan og pamaagi nga magamit pa ang wastes dinha sa matansahan ug ma-convert nga tinubdan sa enerhiya ug organic fertilizer.

Dugang pa, gibutyag nga ang pagtuon makatabang nga masolosyonan ang problema sa kahindik ug polusyon sa dapit dala sa daghang animal wastes gikan sa matansahan.

Dako ang matabang sa maong pagtuon sa dakbayan gawas pa nga ang gikinahanglang pundo alang niini maggikan sa National Research Council of the Philippines (NCRP), panapos ni Konsehal Ian Mark Nacaya.