Pagtunol og social pension sa PWDs padayong hisgutan

Padayong hisgutan sa tigom ugmang adlawa sa Komite sa Social Services ni Konsehal Girlie Balaba ang sugyot paggahin og igong pundo nga magamit alang sa social pension sa mga kabus nga pamilyang adunay PWD dependents.

Sa sugyot ordinansa, gilaraw ang paghatag og tag-P500 matag bulan nga social pension agig pagtabang sa mga PWDs dinha sa ilang panginahanglanon sa tambal, gatas ug uban pa.

Si Balaba, kinsa maoy nangamahan sa gidusong sugyot ordinansa, mipasabot nga ang lakang alayon sa probisyon sa batakang balaod ingon man sa Magna Carta for Persons with Disability nga mga kaakuhan sa gobyerno ngadto sa katawhan.

Mahinumduman nga sa miaging paghisgut sa sugyot, si Konsehal Aga Suan mihangyo nga unta matun-an usab nga ma-usbawan ang sugyot nga P500 kay kun mas dako kaysa tag-P500 ang matunol matag bulan mas makatabang sa katawhang adunay kabilinggan sa panglawas.

Niini, si Balaba nagdapit nila ni Konsehal Yan Lam Lim, City Administrator Atty. Roy Hilario Raagas, City Legal Officer Atty. Kenneth Tamala, DSWD-10 Director Ramel Jamen, City DILG Director Engr. Jane Docallos, Acting CSWD Officer Anecia Tongson, PWD Affairs Officer Maria Liza Corpus, City Budget Officer Atty. Percy Salazar, OIC City Accountant Roxanne Ravidas, City Treasurer Jasmin Maagad ug City Planning and Development Officer Ramir Balquin.