Pagtul-id sa MP hall, drainage system sa Brgy 18 mapatuman

MAPATUMAN na sa Barangay 18 ang ilang mga proyekto sa imprastraktura nga gipundohan karong tuiga. Kini human gisagop sa konseho sa syudad ubos ni Bise Mayor Bebot Rodriguez ang resolosyon nga nag-uli sa ordinansa sa barangay diin nasukip ang ilang 2023 Annual Budget balor P4 milyones kapin.

Lakip sa gipundohan sa barangay mao ang paglimpyo sa mga kanal, pagtul-id sa drainage system, pagrehabilitar sa multi-purpose (MP) barangay hall ug pagtaud og mga suga sa kadalanan.

Dugang nga gigahinan ug gitinguhang mapatuman karong tuiga ang pagpalit og mga kahimanan ug ekipo nga magamit panahon sa kalamidad ingon man ang pagpahigayon og sports fest alang sa kabatan-onan.

Ang resolosyon nga gisagop sa konseho alang sa maong katuyuan gipaluyohan sa komite sa barangay affairs nga gidumala ni Konsehal John Michael Seno ug komite sa pamalaod ni Konsehal Ian Mark Nacaya.