Pagtul-id sa kiosk sa plaza sa Agusan gipundohan

BALOR usa ka milyon ang gigahin sa Sangguniang Kabataan (SK) sa Barangay Agusan aron magamit dinha sa pagparehabilitar sa kiosk sa ilang plaza.

Kini human giuyonan sa konseho sa syudad ubos ni Bise Mayor Bebot Rodriguez ang resolosyon nga nag-uli sa resolosyon sa Barangay Agusan diin nasukip ang ilang SK Supplemental Budget No. 1 nga adunay gibanabanang kinitaan ug galastohon balor P2,849,518.00. Lakip sa gihatagan og prioridad sa SK sa barangay nga mapatuman mao ang pagpalit og usa ka unit split type air-conditioner, usa ka set sa sound system ug stage lights.

Gigahinan usab og igong pundo ang pagpalit og furniture ug fixtures, pag-instalar sa gymnasium signage, pagtul-id sa ilang reading center ug uban pa. Si Konsehal John Michael Seno, chairman sa komite sa Sports and Youth Development, kinsa usa sa nagpaluyo sa gisagop nga resolosyon mipadayag sa iyang suporta sa maong lakang human nakita nga nahisubay kini sa balaod ug dako ang ikatabang alang sa kaarangan ug kalamboan sa mga kabatan-onan.

Ang resolusyon nga gipalabang sa konseho alang sa maong katuyoan gipaluyohan usab sa komite sa pamalaod ni Konsehal Edgar Cabanlas.