Pagtukod sa Tree of Life Marker sa Isla de Oro gilantaw

GILANTAW  nga mapalambo  ingon man  mapanindot ang nagbarog nga punuan sa mangga nga nahimutang sa  Isla De Oro nga gibansagan og Tree of Life.

Kini human gituki   sa komite sa climate change adaptation and disaster risk reduction atol sa tigom  niadtong Huwebes ang  special report ni Konsehal James Judith   nga misugyot  pag-develop sa maong Tree of Life  isip pag-ila sa punuan sa mangga nga giingong dili mominus 50 ka kinabuhi ang  nasalbar sa panahon sa Bagyong Sendong niadtong 2011.

Mibutyag si Judith nga gikoral  kini  kaniadto kay giisip  man kini simbolo sa paglaum apan nakurat siya sa iyang pagbisita kay murag napasagdan  kini  ug nahimo  naman nga tunaan sa kabaw ug lubganan sa  mga hayop butang  nga iyang gikadismaya.

Gipasabot  sa konsehal  nga dugay na kini  nga plano apan dili ka usad tungod sa problema sa pundo hinungdan nga siya mihangyo  sa Technical Working Group sa Project Lunhaw pinaagi ni  Mr. Patrick Gabutina  nga unta maapil kini sa  ilang kinatibuk-an  nga pagpatuman sa Project Lunhaw aron mahatagan sa katumanan.

Si Gabutina  mipasabot  nga wala silay supak sa maong  lakang ug  ilang  lantawon ang  desinyo niini.

Sumala ni Konsehal Bernie Esparcia  nga iyang nakita nga maayo ang gisugyot nga proyekto tungod  kay magsilbi kining  handumanan sa kasaysayan sa maong panghitabo  ug niini iyang gihangyo si Judith pagsumite sa desinyo ug uban pang gikinahanglan nga dokumento ngadto sa Project Lunhaw.