Pagtukod sa Oro City College padayong tun-an

PADAYONG tun-an sa komite sa edukasyon ni Konsehal Suzette Magtajas-Daba ang sugyot ordinansa pagtukod og Cagayan de Oro City College. Gibutyag ni Daba nga kabahin kini sa Executive Agenda ni Mayor Klarex Uy ug usa sa gihatagan og prayoridad nga mapalapdan ang programa sa edukasyon sa kabatan-onan.

Sa tigom sa komite, ang representante sa Commission on Higher Education (CHED)-10 mibutyag sa gikanahanglang proseso ug mga angayang isumete sa ilang buhatan alang sa maong pagtukod. Tipik sa mga gikinahanglan mao ang paghimo og feasibility study, human resources, target clients, budget sa lima ka tuig, titulo sa yuta nga nakapangalan sa LGU kung dili ngalan sa eskwelahan, comprehensive programs, development plan, sanitary permit, organizational chart, mandatory plantilla position, specific programs or courses, ug uban pang mga panginahanglanon alang sa pagpatuman sa maong proyekto.

Niini, giduso balik sa komite ngadto sa Technical Working Group (TWG) nga gipangunahan ni CdOTVI School Administrator Maria Victoria Trinidad og gitahasan aron makomplay ang tanang mga kakulangon. Ang tigom gitambongan nila ni Konsehal Imee Moreno, Bernie Esparcia, Aga Suan, George Goking ug Yvy Emano.

Ang mga sakop sa komite kusganong misuporta sa lakang pagmugna sa maong City College sa dakbayan kay matod nila dako ang purohan nga makahuman sa kolehiyo ang kabatan-onan ilabina kun ang tunghaan anaa matukod duol sa ilang mga pinuy-anan.