Pagtukod og dugang tunghaang elementary sa Kauswagan giuyonan

PADAYONG gihatagan og prioridad sa kagamhanan sa dakbayan ang natad sa edukasyon alang sa kaugmaon sa kabataan sa dakbayan.

Kini human ang konseho sa syudad sa sesyon niadtong Lunes nga gidumala ni Presiding Officer Protempore Konsehal Edgar Cabanlas, misagop sa resolosyon nga nagpadayag og pag-uyon ug paborableng nagrekomendar ngadto sa Department of Education (DepEd) sa pag-establisar og City Engineers Elementary School. Ang maong tunghaan mahimutang sa loteng kanhi giokupahan sa Kauswagan National High School.

Niini, si Konsehal Suzette Magtajas-Daba, chairman sa komite sa edukasyon, mipadayag sa iyang kusganong suporta sa maong lakang kay makatabang kini dili lang sa mga magtutudlo ug mga tinun-an kun dili sa mga ginikanan nga nanimuyo doul sa dapit tungod kay dili na kinahanglang mobyahe pa ang ilang mga anak kay anaa na mismo sa ilang tugkaran ang tunghaan.

Dugang pa, si Konsehal Suzette miingon nga dako og ikatabang ang edipisyo sa mga tinun-an nga makabaton og de kalidad nga edukasyon dili lamang sa Barangay Kauswagan kun dili lakip na sa kasikbit nga mga dapit.

Wala nay rason nga dili makapatungha ang mga ginikanan sa ilang mga anak kay anaa na gyud sa ilang tugkaran ang tunghaan nga magdala kanila sa maayong kaugmaon sa kinabuhi.

Ang resolosyon nga gisagop sa konseho alang sa maong katuyoan gipaluyohan ni Konsehal Suzette Magtajas-Daba.