Pagtukod og city pound facility gisugyot ni Pascual

“KATONG atong facility man gud nga anaa sa Barangay Balubal is not a dog pound, usa kini ka animal rescue facility”.

Kini ang gibutyag ni Konsehal Jay Roa Pascual, chairman sa Komite sa Agriculture, agig reaksyon sa taho ni Konsehal Bernie Esparcia atol sa sesyon niadtong Lunes nga gidumala ni Bise Mayor Bebot Rodriguez kabahin sa operasyon sa city pound sa Barangay Balubal.

Gipasabot ni Pascual nga ang tanang hayop nga naluwas sa kalamidad didto dad-on sa maong facility sama sa baboy, kanding, baka, kabaw, iring, iro ug uban pa.

Sa pagkakaron ang dakbayan walay pound facility sa pag-atiman sa laaw nga mga iro ug iring.

Niini, naglaum si Pascual nga mahisgutan sa hintungdang komite ang paggahin og dugang pundo alang sa pagtukod og kaugalingong city pound facility ug mabulag ang mga iro ug iring kay kini ang usa sa nakita sa konsehal nga masolusyonan ang kaso sa pagtaas sa rabies sa syudad.