Pagtipig sa supply sa bugas gipanghimakak

Walay nahitabong pagtipig o’ pagtago sa mga baligyang bugas dinhi sa dakbayan sa Cagayan de Oro. Kini ang nasuta ni Konsehal George Goking, atol sa milabayng tigom sa Komite sa Trade and Commerce, human gituki ang gikatahong pagtipig o’ pagtago sa supply sa bugas dinha sa kamerkadohan nga matod pa hinungdan sa pagsaka sa presyo sa bugas.

Sa tigom, ang representante sa kapolisan namahayag nga dili tinuod ang gitahong pagtipig sa supply sa bugas tungod kay sa ilang gihimong imbestigasyon, walay nakitang ebidensya sa maong alegasyon.

Hinuon, sila mipasalig sa ilang suporta sa kagamhanang lokal dinha sa padayong pagsusi sa supply sa bugas sa kamerkadohan.

Sa ilang bahin, ang mga negosyante pinaagi ni Efren Uy sa Cagayan de Oro Chamber of Commerce and Industry Foundation, Inc., mibutyag nga wala silay nadungog nga taho kabahin sa alegasyon sa pagpanago sa bugas apan gikabutyag ang gamayng omento sa presyo sa bugas matag kilo.

Dugang pa, nasayran gikan sa kadagkoan sa rehiyonal nga buhatan sa National Food Authority (NFA), Department of Trade and Industry (DTI), ug Department of Agriculture (DA) nga walay namatikdang rice hoarding dinhi sa syudad. Matod sa konsehal nga gikinahanglan ang tukmang kasayuran sa maong taho aron malikayan ang walay basihan nga pagsabwag sa dili maayong binuhatan.

Hinuon, agig tubag sa gipatumang omento sa presyo sa bugas matag kilo, adunay ipahigayong Kadiwa sa Pangulo sa tibuok nasud karong adlawa, Hulyo 18 dinha sa Capitol Ground samtang sa umaabot Hulyo 25-31, 2023 gitakda ang Kadiwa dinha sa Limketkai Mall, ug sa Hulyo 28, 2023 ang kadiwa himuon dinha sa rehiyonal nga buhatan sa Department of Agriculture sa dalan Antonio Luna.