Pagtino sa pagpanag-iya sa mga IP sa luna gihingusgan ni Cabaring

KUSGANONG  gihangyo ni Konsehal Datu Roberto Cabaring, chairman sa komite sa cultural communities, ang Konseho sa Syudad nga mahatagan og pagtagad ang katungod sa mga Indigenous People (IP) sa pagpanag-iya sa usa ka parsela nga luna diha sa Sitio Village, Barangay Dansolihon.

Sa iyang special report atol sa sesyon niadtong Lunes nga gidumala ni Bise Mayor Bebot Rodriguez, si Konsehal Cabaring mibutyag nga na-alarma ug nabalaka ang mga lumad human nadawat ang notice to vacate ug gipasidan-an sa pagpangandam sa usa ka demolisyon nga ipahigayon sulod sa tulo ka adlaw.

Gipasabot ni Cabaring nga sa dugay na nga panahon, gikan pa sa kasaysayan sa ilang mga katigulangan, diha na sila natawo sa maong luna.

Tungod niini, si Konsehal Cabaring hugot nga mihangyo sa Konseho sa usa ka panagtagbo uban sa buhatan sa Department of Natural Resources (DENR), Department of Agrarian Reform (DAR) ug National Commission on Indigenous Peoples (NCIP) aron mapadayag sa mga lumad ang ilang katungod sa pagpanag-iya ug mahatagan og katin-awan ang gitawag nga native title nga gikan pa sa kasaysayan sa ilang mga katigulangan.

Ang maong taho giduso ni Bise Mayor Bebot Rodriguez ngadto sa komite sa cultural communities ubos ni Konsehal Roberto Cabaring ug sa komite sa pamalaod ug reglamento ni Konsehal Edgar Cabanlas alang sa dugang pagtuon ug tukmang aksyon. (RNQuiblat/SP)