Pagtino asa nahisakop ang Macahambus Cave himoon sa komite ni Pascual

GIPAABOT nga tukion sa Komite sa Turismo ubos ni Konsehal Jay Roa Pascual ang isyu kon asa nga barangay nahisakop ang Macahambus Cave ug Gorge, ning syudad.

Mahinumdoman nga kini ang unod sa special report ni Konsehal James Judith sa miaging sesyon nga gidumala ni Bise Mayor Bebot Rodriguez.

Buot ni Judith nga matumbok gayud asa nahisakop nga barangay ang Macahambus Cave aron masugdan ang dugang pagpalambo sa maong langub nga usa sa mga tourist attraction sa dakbayan sa Cagayan de Oro.

Nanghinaut si Konsehal Pascual nga makatambong ang mga hintundang ahensya sa dakbayan ug mga hintundang buhatan sa City Hall aron makuha ang ilang opinyon ug rekomendasyon.