Pagsusi sa mga tulay sa syudad, gisuyot ni Konsehal Dahino

HUGOT nga gisugyot ni Konsehal Edna Dahino, chairman sa komite sa Women and Family Relations sa konseho nga masusi ang tanang tulay sa dakbayan sa tinguha nga masuta ang kalig-on sa pundasyon niini alang sa kaluwasan sa tanan.

Kini ang unod sa special report ni Konsehal Dahino sa sesyon niadtong Lunes nga gidumala ni Bise Mayor Kikang Uy.

Gipasabot sa konsehala nga daghan nang bagyo ug mga pagbaha ang natigayon sa syudad hinungdan nga angayan kining masusi sa mga hintunghang ahensya sa gobyerno labina nga ang uban niini nga dugay nang natukod.

Kinahanglan kining mag-inspeksyon aron masuta ang kalig-on sa maong mga tulay aron nga luwas kining ma monitor alang sa proteksyon ug kapaseguroan sa katawhan, pamahayag ni konsehal Dahino.

Nunot niini, gisugyot ni Konsehal Dahino nga mahimong manguna sa himoong inspeksyon o pagsusi ang buhatan sa City Engineering (CEO) sa pakigtambayayong sa Department of Public Works and Highways (DPWH) nga mga experto sa natad sa engineering.