Pagsusi sa loteng gisugyot gamiton nga agri demo farm ugmang adlawa

Magpanon ang mga sakop sa Komite sa Subdivision ni Konsehal Edgar Cabanlas ugmang adlawa, Hunyo 14, 2023, aron pagsusi sa loteng gitumbok nga gamiton sa integrated demonstration farm ug research center sa mga mag-uuma ug mangingisda.

Kini nahimutang dinha sa Zone 4, Barangay Baikingon ug gipanag-iyahan sa mag-asawang Antonio Pontipedra.

Mahimumduman nga si City Agriculturist Paterno Gonzales, Jr mipadayag ngadto sa komite nga ang pagpalit sa maong luna nga tukuran sa maong proyekto maoy tubag sa kakulangon sa dakbayan sa gikinahanglang demonstration farm ug research center.

Kini, matod pa, magpasayon sa pagtuon nga himuon aron mahatagan sa dugang kalamboan ang kahibalo, kaantigo ug kahanas sa mga mag-uuma ug mangingisda.

Ang pagsusi gipaabot tambongan nila ni Konsehal Malou Gaane, Girlie Balaba, George Goking, Joey Abbu, Roger Abaday, James Judith II ug Bise Mayor Bebot Rogriguez.