Pagsuot sa Reflectorized Hi-Vest sa motorista gihingusgan ni Abaday

GITINGUHA ni Konsehal Roger Abaday, chairman sa komite sa games ug senior citizen nga maminusan ang disgrasya sa kadalanan hinungdan nga gisugyot niini ang pagsul-ob sa Recflectorized Hi-Vest sa mga nagmaneho sa motorsiklo, e-bike, ug bisikleta ilabi na panahon sa gabii.

Kini ang unod sa special report ni Konsehal Abaday atol sa sesyon niadtong lunes nga gidumala ni Bise-Mayor Kikang Uy.

Sumala sa konsehal nga subay sa iyang nakuha nga data sa buhatan sa Roads and Traffic Administration (RTA), sa bulan sa Enero 21 hangtod Mayo 21 ning tuig mokabat sa 925 ka kaso sa aksidente sa kadalanan ang natigayon diin nalambigit ang motorsiklo.

Samtang mo-abot usab ngadto sa 12 mil kapin ang nangamatay sa disgrasya sa kadalanan sa tibook Pilipinas matag tuig.

Hinoon gi-klaro ni Abaday nga ang pagsuot sa Reflectorized Hi-Vest mag-sugod sa alas 6:00 sa hapon hangtod 6:00 sa buntag diha sa atong highway nga bahin ug gisugyot niini ang pagpalabang sa ordinansa alang sa maong katuyoan.

Niini giduso ni Bise-Mayor Kikang Uy ang maong sugyot ngadto sa komite sa Roads and Traffic management ni Konsehal Romeo Calizo alang sa dugang pagtuon ug rekomendasyon.