Pagsunod sa rela zoning law giawhag

ANG komite sa roads and traffic management ni konsehal Romeo Calizo hugot nga nanawagan sa mga driver ug operator sa motorela dinhi sa syudad nga hatagan sa higayon ang pagpatuman sa zoning law.

Kini human ang komite sa tigom sa milabayng adlaw mituki sa sulat hangyo sa usa ka motorela operator kalabot sa pagpatuman sa Roads and Traffic Administration (RTA) sa motorela zoning ordinance sa tibouk dakbayan.

Ang kapunungan sa mga driver ug operator sa rela mihangyo nga ihikling una ang pagpatuman sa balaod tungod sa nasinating pandemya.

Apan si konsehal Eric Salcedo mipasabot nga kun mahimo hatagan sa higayon nga mapatuman ang balaod tungod kay tinguha niini nga maminusan ang problema sa trapiko ilabina sa sentrong bahin sa syudad.

Sa ilang bahin, ang kadagkoan sa RTA mipasabot nga ilang gipatuman ang usa ka bulan nga dry run sa maong zoning regulation aron masuta ang ka-epektibo niini dinha sa pagsulbad sa problema sa trapiko.

Niini, si RTA assistant department head Engr. Nonito Oclarit midugang nga wala pay gihimong pagsikop sa mga makalapas sa zoning regulation kun dili pagpahibalo lang sa mga driver ug operator nga sa umaabot Marso 15, 2021 hingpit nang ipatuman ang maong balaod.

Dako ang paglaum nila ni konsehal Calizo uban nila ni konsehal Lordan Suan ug Salcedo nga usa sa makatabang pagsulbad sa problema sa trapiko ang balaod sa motorela zoning regulations. (SP)