Pagsulbad sa kahimtang sa trapiko gihingusgan ni Abbu

DISIPLINA sa motorista ug ang hingpit nga pagpatuman sa mga balaod ang posible nga makasulbad sa pagkabukog sa dagan sa trapiko sa pipila ka dagkong mga dalan dinhi sa syudad.

Kini ang unod sa special report ni Konsehal Joey Abbu, Jr, Chairman sa Komite sa Labor, atol sa sesyon niadtong Lunes nga gidumala ni Bise Mayor Bebot Rodriguez.

Gitumbok sa konsehal ang iyang kasinatian nga permi gyud adunay pagkabukog ang dagan sa trapiko diha sa may Corrales Extension ilalom sa Gaisano Mall ug sa J.R. Borja-Roxas Street sa Cogon paingon sa Pearlmont Hotel, ning syudad.

Matod ni Abbu nga ang usa sa nakit-ang hinungdan sa problema sa trapiko sa dapit bisan pa man anaa ang presensya sa traffic enforcer mao ang gihimong pag-alley sa tunga pa gyud sa dalan sa mga motorela, PUJ ug uban pang matang sa transportasyon.

Dugtong sa konsehal nga ang dakbayan usa ka highly urbanized city ug normal nga adunay problema sa dagan sa trapiko apan gikinahanglan usab nga ma-manage pud ang pagdumala ang sitwasyon niini.

Ang maong taho giduso ni Bise Mayor Bebot Rodriguez ngadto sa Komite sa Public Utilities (Roads and Traffic Management) ubos ni Konsehal Romeo Calizo aron matawag ang atensyon sa mga traffic enforcers sa ingon mahatagan og kasulbaran ang maong problema dili lamang sa maong mga dapit kundi ang tibook kadalanan sa syudad.