Pagsinabtanay ning panahon sa pandemya, gihangyo ni Salcedo

Sinabtanay kita nining panahon sa pandemya dala sa Covid 19.

Kini ang hugot nga pamahayag ni Konsehal Enrico Salcedo, chairman sa komite sa environment and natural resources human kini gihinabi sa usa ka estasyon sa radyo kagahapon.

Matod sa konsehal nga niining panahon sa pandemya apektado gayod ang ekonomiya sa syudad maong gihangyo niini ang pagsabot sa katawhan labina dihas mga hinabang nga itunol kanila.

Gipasabot sa konsehal nga ang buwis mao ang lifeblood sa kagamhanan ug diha nag-agad ang hinabang nga matunol sa syudad ngadto sa katawhan .

Kini ang panahon nga magsinabtanay kita kay ang gobyerno naningkamot gayod pagpangitag pamaagi sa mga kaayohan ug kaluwasan alang sa kinabag-ang katawhan sa syudad, dugang pamahayag ni Salcedo.

Niini gihangyo ni Salcedo ang tanan nga mosunod lang sa mga health protocol nga gisitar sa gobyerno samtang gipaubos ang syudad sa MECQ dala ang panghinaot nga pinaagi niini mokonhod ang pagsaka sa kaso sa Covid-19 dinhi sa syudad.