Pagrepaso sa ordinansa sa tipping fee gisugyot

GIKLARO ni Konsehal Edgar Cabanlas, chairman sa komite sa urban and rural poor and housing development, nga ang ehekotibo ug ang opisina sa CLENRO maoy ga-preparar sa Implementing Rules and Regulation (IRR) ug ang lehislatibo igo lang sa pagpasa sa ordinansa ug wala kini gahum sa pagpahunong sa koleksyon.

Kini ang gipa-ambit nga opinion ni Konsehal Cabanlas sa sesyon ni-adtong Lunes kabahin sa gipadangat nga special report ni Konsehal John Michael Seno mahitungod sa koleksyon sa tipping fee sa sanitary landfill.

Sumala ni Cabanlas nga tungod sa managlahing interpretasyon sa tipping fee ingon man sa household garbage nakahatag kini sa gamayng kalibog apan dili angay magkagubot kay ang tanan adunay kaikag pag-korek sa ordinansa hinungdan iyang gisugyot nga lingkuran ug tun-an kini.

Mas maayo nga aduna kitay mga lakang ug paglantaw aron sa pagsuspende sa tipping fee sa tuig 2018, pamahayag ni konsehal Cabanlas.

Nunot niini giduso ni Bise Mayor Kikang Uy sa komite sa environment ni Konsehal Eric Salcedo alang sa dugang pagtoon ug tukmang disposition.