Pagproteher, pagpalambo sa Monigue Cave gilantaw

Hayan mapalapdan pa ang kampanya pagpalambo ug pagproteher sa Monigue Cave dinha sa Barangay Mambuaya. Kini human giuyunan sa konseho sa syudad sa sesyon niadtong Lunes nga gidumala ni Bise Mayor Jocelyn Rodriguez ang ordinansa nga naghatag og katungod ni Mayor Rolando Uy pagpirma sa Memorandum of Agreement (MoA) tali sa Department of Environment and Natural Resources (DENR-10) kalabot sa pagpatuman sa management plan sa maong langob. Ubos sa MoA, gipasabot nga usa sa palisiya sa estado ang pagpreserba, pagproteher ug pagdumala sa mga langob ug tinubdan niini isip kabahin sa natural wealth sa nasud.

Niini, ang DENR maoy gitahasan dinha sa pagpatuman sa probisyon sa Akta Republika No. 9072 kon National Cave and Cave Resources Management Protection Act o’ Cave Act uban sa pakigtambayayong sa Department of Tourism (DOT), the National Museum, National Historical Commission of the Philippines, Department of Interior and Local Government (DILG) ug mga hintundang lokal nga kagamhanan.

Samtang ang lokal nga kagamhanan sa Cagayan de Oro maoy mopaambit ngadto sa nasudnong gobyerno sa responsibilidad diha sa pagdumala ug pagmintinar nga magpabiling balanse nga ekolohiya sulod sa tagsa tagsa ka teritoryo alayon sa Akta Republika No. 7160 kon Local Government Code of 1991.

Ang giuyunang MoA naglatid sa tagsa-tagsa ka tahas, responsibilidad ug tulubagon sa matag partido dinha sa tinguha nga mapreserbar, mapalambo ug epektibong madumala ang mga langob sa syudad. Ang ordinansa nga gipalabang sa konseho alang sa maong katuyuan gipaluyuhan sa komite sa environment ni Konsehal Roger Abaday ug komite sa pamalaod ni Konsehal Ian Mark Nacaya.