Pagproseso sa internship, work immersion sa mga tinun-an dihas City Hall gipasayon

Hayan mapadali na ang pagproseso sa panugot alang sa internship ug work immersion sa mga tinun-an dinha sa City Hall.

Kini human gipalabang sa konseho sa syudad sa sesyon niadtong Lunes nga gidumala ni Bise Mayor Bebot Rodriguez ang ordinansa nga naghatag og katungod ni Mayor Rolando “Klarex” Uy pagpirma sa Standardized Memorandum of Agreement (MoA) tali sa kagamhanan sa dakbayan ug mga tunghaan.

Kini naglangkob sa programa sa work immersion alang sa mga tinun-an sa Senior High School ug internship alang sa nagtungha sa kolehiyo sa lain laing tunghaan dinha sa City Hall subay sa DepEd Order No. 30, series of 2017 ug CHED Memorandum Order No. 104 series of 2017.

Tumong sa ordinansa nga dili na kinahanglan mangayo pa ang mayor sa katungod gikan sa konseho aron malagdaan ang MoA tali sa mga tunghaan matag adunay pagahimoong work immersion o’ internship.

Ang panagtambayayong sa mga tunghaan ug lokal nga kagamhanan sa Cagayan de Oro gitumong sa paghatag og dugang kahibalo sa mga tinun-an ug pagpalambo sa ilang kasinatian dala ang paglaum nga mahanas kini sa napiling kurso.

Ang gipalabang nga ordinansa sa konseho alang sa maong katuyoan gipaluyohan sa komite sa edukasyon ni Konsehal Suzette Magtajas-Daba ug sa komite pamalaod ni Konsehal Ian Mark Nacaya.