Pagpreserbar sa pottery making padayon tukion sa komite ni Kon. Pascual

PADAYONG tukion sa Komite sa Turismo ubos ni Konsehal Jay Pascual ang gisugyot nga ordinansa ni Konsehal Girlie Balaba kabahin sa iyang panawagan nga mapreserbar ang pottery making diha sa Barangay Bulua.

Kini human nadungog ang mga representante sa pottery makers association ang ilang problema sa pagdisplay sa ilang mga lokal nga produkto sama sa kaang, kolon ug banga.Ilang gihangyo nga mahatagan unta sila og display center sa ilang mga produkto kay gamiton na sa tag-iya sa lote ang ilang mga pwesto diin nahimutang ang ilang mga baligya ug gitagaan nalang sila og gamay’ng panahon.

Gipasabot sa asosasyon nga kung mabalhin sila, gusto nila nga sa maong barangay lang gihapon kay taas na nga panahon nga diha sila nagtinda og mas dali kanila magdisplay kay duol raman sa gihimoan.

Si Barangay Kapitan Al Legaspi, Jr. mibutyag nga naningkamot ang konseho sa barangay nga mahatagan sila og lokasyon kay gawas nga nahimong panginabuhian, dinhi naila pag ayo ang among barangay, pero subo lang kaayo kay sobra na kataas ang presyo sa luna sa dapit, matod sa Kapitan.

Alayon niini, ang komite magdapit sa sunod nga tigom sa Department of Education (DepEd) aron hangyoon nga gamiton ang bakanteng lote atubangan sa Bulua National High School isip display area.Ang tigom gitambongan usab nila ni Konsehal Girlie Balaba ug Aga Suan.