Pagpreserbar sa mga historical heritage sa syudad gihingusgan ni Konsehal Esparcia

KINAHANGLAN nga ipreserbar ug ampingan ang mga Historical Heritage o mga kabilin sa kasaysayan sa syudad .

Kini ang unod sa special report ni Konsehal Bernie Esparcia sa sesyon sa Konseho niadtong Lunes nga gidumala ni Bise Mayor Bebot Rodriguez mahitungod sa nahitabong pagguba sa pipila ka mga edifisyo nga nahimo nang kabilin sa kasaysayan sa syudad sama nalang sa koral sa City Central School ug uban pa.

Mahinumduman nga usa ka kagay-anon nga nagpadayag sa iyang kahingawa diha sa iyang post sa social media tungod sa pagguba sa pipila ka historical heritage nga wala na mahatagi sa importansya. Gipasabot ni Esparcia nga kon adunay susamang mga edifisyo o istraktura nga paga-usabon moagi man kini dapat og konsultasyon sa City Historical Commission ug City Heritage and Study Center.

Hinoon gibutyag ni Konsehal Esparcia nga dili siya lumad nga taga Cagayan de Oro apan dili mahimo nga kalimtan nalang ang mga nindot nga kasaysayan sa syudad maong angayan kini nga hatagan sa igong pagtagad tungod kay kung atong pasagdan ang pagpresebar niini nga mga bahandi, atong iandam ang dalan alang sa paglimot kon asa ta gikan, pamahayag ni Konsehal Esparcia.