Pagpatuman sa Project ACE sa CDO gilugwayan

Padayong mapatuman dinhi sa dakbayan sa Cagayan de Oro ang Project Against Child Exploitation (ACE). Kini human ang konseho sa syudad ubos ni Bise Mayor Bebot Rodriguez mipalabang sa ordinansa nga naghatag og katungod ni Mayor Klarex Uy paglagda sa Memorandum of Agreement (MoA) tali sa World Vision Development Foundation, Inc. alang sa maong katuyuan.

Mahinumduman nga ang kadagkoan sa World Vision una nang mipahibalo nga nahatagan sila sa US Department of Labor og dugang usa ka tuig nga lugway alang sa pagpatuman sa proyekto. Mahinumduman nga ang kagamhanan sa dakbayan pinaagi sa pipila ka ordinansa milagda og Memorandum of Agreement tali sa World Vision alang sa pagpatuman sa proyekto sa tinguha nga mapakgang ang mga kaso sa pagpang-abuso sa kabataan lakip na ang Worst Form of Child Labor (WFCL) ug Online Sexual Exploitation of Children (OSEC).

Ang proyekto gipatuman dinha sa barangay Cugman, Puntod ug Gusa isip mga pilot areas human natumbok base sa DOLE-CDO Child Labor Profiling nga daghan ang child laborers sa maong mga dapit. Subay sa kasamtangang MoA tali sa dakbayan ug World Vision, ang implementasyon sa proyekto mahuman sa umaabot Septembre 30, 2023. Niini, si Konsehal Girlie Balaba, chairman sa komite sa social services ug usa sa nagpaluyo sa ordinansa, mibutyag nga sa pagpalabang sa bag-ong MoA, gilugwayan ngadto sa Septembre 30, 2024 ang pagpatuman sa proyekto dinhi sa syudad. Siya malaumon nga daghan pang kabataan ang maabagan ug mapalambo ang kinabuhi sa pagpatuman sa proyekto.

Ang ordinansa nga gipalabang sa konseho alang sa maong katuyuan gipaluyohan usab sa komite sa pamalaod ni Konsehal Edgar Cabanlas.