Pagpatuman sa 2 PovDev programs gilantaw

GILANTAW nga mapatuman dinhi sa dakbayan sa Cagayan de Oro ang dugang proyekto nga magpalapad sa Population and Development (PopDev) Programs.

Kini human ang buhatan sa Community Improvement Division (CID) misumete sa plano ug banabana sa gahin ngadto sa Konseho sa syudad ubos ni Bise Mayor Kikang Uy alang sa pagpatuman sa dugang mga programa sa tinguha nga matunol ang epektibo ug efficienteng serbisyo ngadto sa katawhan.

Ang plano naglakip sa paggahin og kapin sa P2.22 milyones alang sa Adolescent Health and Development (AHD) Program nga gitumong pag-abag sa kabatan-onan nga malikayan ang sayo ug balik balik nga pagmabdos ug uban pang delikadong mga kalihokan.

Matod pa nga taliwala sa kakulangon sa pundo, naangkon gihapon sa dakbayan ang Healthy Pilipinas Awards for Healthy Communities 2022 Priority Area 6 on Sexual and Reproductive Health nga gitunol niadtong Marso 4, 2022.

Lakip sa gihangyong mapundohan mao ang Population and Development Integration balor P2.5 milyones.

Ang programa gitinguha sa pagkuha sa data sa population aron mahimong basihan sa pagplano, pag-umol og mga palisiya ug pagtunol sa angayang serbisyo ngadto sa katawhan.

Ang hangyo sa CID giduso ni Bise Mayor Kikang Uy ngadto kang Konsehal Edgar Cabanlas alang sa pagtuon ug rekomendasyon.