Pagpataka og labay sa upos sa sigarilyo gidili sa barangay Cugman

MULTAHAN na ang si bisan kinsa nga masapon nga magpataka og labay sa ilang upos sa sigarilyo diha sa Barangay Cugman ning syudad.

Kini human ang konseho sa syudad sa sesyon niadtong Lunes nga gidumala ni Bise Mayor Kikang Uy misagop og resolusyon nga nag-uli sa ordinansa sa Cugman nga nagdili sa pagpalabay sa upos sa sigarilyo sa mga pampublikong lugar ug nagpahamtang og igong multa alang niadtong makalapas sa ordinansa.

Gipasabot sa ordinansa nga kinahanglan nga responsable ang mga gapanigarilyo sa paglabay sa ilang mga opos labina nga usa kini sa nakahatag sa polusyon tungod kay bisan asa lang nga gaipanglabay.

Giingon usab nga segun sa EcoWaste Coalition, moabot sa 15 pa ka tuig ayha nga madunot ang opos sa sigarilyo hinungdan dili makatarunganon ang paglabay niini sa bisan asa lang.

Si konsehal Yan Lam Lim, chairman sa komite sa Barangay Affairs mibutyag nga iyang gisuportahan ang maong lakang tungod makaayo kini sa kinabag-an ug dakong tabang aron malikayan ang polusyon nga dala sa mga opos sa sigarilyo.

Ang resolusyon nga gipalabang sa konseho alang sa maong katuyoan gipaluyohan sa komite sa Barangay Affairs ubos ni konsehal Lim ug komite sa pamalaod ug reglamento ubos ni konsehal Ian Mark Nacaya.