Pagpasundayag sa talento sa tribu Higaonon tun-an

Nakita ni Konsehal John Michael Seno, chairman sa Komite sa Sports and Youth Development, ang kamahinungdanon sa taho ni Konsehal Bernie Esparcia nga ipreserbar ug ampingan ang mga historical heritage o’ mga kabilin sa syudad.

Kini ang gibutyag sa konsehal, atol sa sesyon sa konseho niadtong Lunes nga gidumala ni Bise Mayor Bebot Rodriguez, sa panawagan ni Esparcia nga ipasundayag ang talento sa mga Tribu Higaonon panahon sa kapistahan sa dakbayan sa Cagayan de Oro.

Gipasabot ni Seno nga unta ang kasaulogan sa pangilin ni St. Augustine magpasidungog ug magdayeg sa mga kalihokan pahaum sa kapistahan sa patron.

Niini, iyang gisugyot nga matun-an ang pagpasundayag sa talento sa mga lumad sa dakbayan atol sa kasaulogan sa Charter Day sa dakbayan aron nga mas mabibo kini nga kalihokan.

Siya naglaum nga mahisgutan sa hintungdang komite sa konseho kun asa ipasundayag ang talento sa mga lumad panahon ba sa kasaulogan sa Charter Day o’ sa kapistahan sa dakbayan sa Cagayan de Oro.