Pagpanday sa sugyot ordinansa alang sa katungod ug kaayohan sa mga estudyante nagpadayon

PADAYON karong gipanday sa komite sa Sports and Youth Development ni Konsehal John Michael Seno ang sugyot ordinansa nga maghatag og code alang sa mga

katungod ug kaayohan sa mga estudyante o Student Right and Welfare (STRAW).

Sa gipahigayong tigom sa komite, ang mga hintungdang buhatan sa kagamhanan misomete sa ilang mga rekomendasyon og opinion aron malakip sa maong sugyot ordinansa.

Sa iyang bahin , si Konsehal Suzette Magtajas Daba , chairman sa komite sa Edukasyon mibutyag nga dako og ikatabang ang maong balaodon ngadto sa mga tinun-an ug gani gisugyot niya nga dapiton ang kadagkoan sa mga tunghaan ingon man ang mga opisyal sa Parents Teachers Association (PTA) aron makonsulta usab sila ug mapasabot kanila ang kamahinungdanon sa maong balaodnon.

Hinoon si Konsehal Seno mibutyag nga paminawon ug konsiderahon sa iyang komite ang tanang rekomendasyon aron masigurong hamugaway ang pagpatuman niini.

Subay niini, ang komite sa sports uban sa komite sa edukasyon ni Konsehal Suzette gitakdang mopahigayon og hiniusang tigom sa umaabot Pebrero 2 ning tuig aron ipadayon ang deleberasyon sa sugyot ordinansa.