Pagpamutol sa kahoy dihas Macapagal Highway gikahingawa ni Abaday

GIKAHINGAWA ni Konsehal Roger Abaday ang sunod-sunod nga pagpamutol sa mga kahoy tungod sa gihimong proyekto pagpalad sa dalan ug drainage system diha sa Masterson Avenue ug Macapagal Highway sa mga kawani sa Department of Public Work and Highway.

Gustong masuta sa konsehal kun gisunod ba sa kontraktor ug sa hingtungdan ahensya sa goberno ang Memo Circular nga nagmando nga sa matag usa ka punoan sa kahoy nga putlon, kinahanglan motanom usab sa usa ka gatos (100) ka mga seedlings sa kahoy.

Kini ang unod sa Special Report ni Konsehal Roger Abaday atol sa sesyon niadtong lunes nga gidumala ni Bise Mayor Bebot Rodriguez.

Sumala sa konsehal nga base sa permit nga gi-isyu niadtong May 16, 2024, adunay mokabat sa 293 ka mga punoan sa kahoy ang maputol aron mapadayon ang maong proyekto nga nagsumikad sa Chinese Cemetery paingon sa Baranagy Lumbia ning syudad.

Gustong masiguro ni konsehal Abaday kon gituman ba sa kontraktor ang gabayan nga gisita sa goberno. Kon masuta nga napakyas kini sa pagtuman, nangusog si Konsehal Abaday nga kini mapahamtangan sa administrative penalties.

Niini gisugyot ni Abaday nga dapiton ang contractor sa maong proyekto sa hiniusang tigom sa Komite sa Public Works ni Konsehal Edgar Cabanlas, Komite sa Environment ni Konsehal Roger Abaday alang sa tukmang aksyon.