Pagpamalit og mga ekipo gipundohan sa Barangay 15

HAYAN makatagamtam og dugang kalamboan ang katawhan sa Barangay 15.

Kini human ang konseho sa syudad sa sesyon niadtong Lunes nga gidumala ni Bise Mayor Bebot Rodriguez, misagop sa resolusyon nga nag-uli sa ordinansa sa barangay diin nasukip ang ilang 2024 Supplemental Budget No. 1 nga adunay gibanabanang kinitaan ug galastohon balor P2,190,422.22.

Lakip sa gigahinan sa barangay ang balor P1,228,439.22 milyones aron ipalit og mga ekipo nga magamit sa ilang buhatan ug ang proyekto alang sa infrastraktura.

Gipundohan usab sa barangay ang pagtunol og benepisyo sa mga kawani niini ug uban pang mga programa nga gilantawng maghatag og dugang kalamboan sa kinabuhi sa katawhan sa barangay.

Ang resolusyon nga gipasaka sa Konseho alang sa maong katuyuan gipaluyohan sa Komite sa Barangay Affairs ni Konsehal Yan Lam Lim ug Komite sa Pamalaod ni Konsehal Edgar Cabanlas.