Pagpalit sa loteng tukuran sa Baikingon public cemetery gihangyo

KONSIDERAHON sa konseho sa syudad ubos ni bise mayor Kikang Uy ang hangyo sa barangay Baikingon nga makaangkon og pampublikong sam-ang.

Kini human ang barangay mipasaka sa Resolosyon No. 4-2021 nga naghangyo sa bise mayor pagpalabang sa ordinansa nga maggahin og igong kantidad aron magamit pagpalit sa gitumbok nga loteng tukuran sa sam-ang sa barangay.

Sa maong resolosyon, gibutyag nga ang kakulangon sa sam-ang ang usa sa mga problema nga giatubang sa barangay ug aduna nay na-ilang lote nga posibleng tukuran sa proyekto.

Nasayran nga niadto pang tuig 2010 gideklara sa barangay nga gamitong sam-ang ang loteng nahimutang sa Zone 6, Patingtigan nga adunay gilapdon nga 4.9 hectares.

Dako ang ilang panghinaut nga matabangan sa konseho nga magahinan ang ilang gilaraw nga proyekto alang sa dugang kaarangan sa kinabuhi sa katawhan sa barangay. (SP)