Pagpalapad sa serbisyo ngadtos kabatan-onan gitinguha sa brgy Cugman

HATAGAN og pagtagad sa komite sa Barangay Affairs ni Konsehal Yan Lam Lim ang gidusong ordinansa sa Barangay Cugman.

Kini nagmugna sa Adolescent Youth-Friendly Barangay Facility sa Cugman.

Giingon nga dako ang papel sa kabatan-onan nga molambo ang usa ka komunidad ug kaakohan sa gobyerno nga maprotektahan ug mahatag kanila ang kaarangan aron makiglambigit sa mga kalihokan sa barangay.

Dugang pa, ang gobyerno adunay kaakuhan nga magtunol sa gikinahanglang batakang serbisyo ug facilidad alang sa panglawas ug serbisyo sosyal uban sa mga programa ug proyekto alang sa kaayohan sa kabatan-onan.

Sa maong ordinansa gipasabot sa barangay nga angayan nga matunol ang tukmang serbisyo ngadto sa kabatan-onan uban sa paghatag og mga insaktong lakang sa pag-atiman sa panglawas ug pagplano sa pamilya aron mamahimong responsableng ginikanan sa umaabot. (SP/RNQuiblat)