Pagpalapad sa dalan, pag-instalar og road signs, ubnp girekomendar

Palapdan ang dalan ug butangan sa mga road signs ang junction sa Masterson Avenue atubangan sa Bank of the Philippine Islands (BPI).

Mao kini ang pipila sa rekomendasyon sa Roads and Traffic Administration (RTA) atol sa milabayng tigom sa komite sa public works ni Konsehal John Michael Seno. Kini agig tubag sa hangyo sa Federation of Uptown Villages Homeowners Association Inc. (FUVHOA) kalabot sa kapiot sa dagan sa trapiko dinha dapit sa traffic light sa may junction sa Masterson Avenue atubangan sa BPI.

Si Engr. Cabactulan sa RTA mibutyag nga dili na kinahanglan ang pagbutang og traffic light sa dapit tungod kay nakapasamot hinoon kini sa dagan sa trapiko ug kinahanglan nga gamitan sa lain nga approach.

Gidugang niya nga ila usab nga gidili ang double perpendicular parking sa duha ka mga banko sa dapit tungod kay nakadugang kini sa kapiot sa trapiko.

Niini, si Seno mipasabot nga kinahanglang mahatagan sa daling pagtagad ang hangyo sa kapunungan kay ang uptown area labihan na gayud kahuot ang dagan sa trapiko labina panahon sa buntag ug gabii.

Ang konsehal miawhag sa RTA pagsumete sa ilang mga rekomendasyon ngadto sa komite aron kini maduso ngadto sa Department of Public Works and Highways (DPWH). Ang maong tigom gitambungan usab ni Konsehal Yvy Emano.