Pagpalapad sa Climate Change Action giuyunan

Hayan mahatagan sa dugang kalamboan ug mapalapdan ang mga programa kabahin sa Disaster Risk Reduction (DRR), Climate Change Action (CCA) ug Resiliency sa dakbayan sa Cagayan de Oro.

Kini human hiniusang giuyonan sa konseho sa syudad sa sesyon niadtong Lunes nga gidumala ni Bise Mayor Bebot Rodriguez ang ordinansa nga naghatag og katungod ni Mayor Klarex Uy pagpirma sa Memorandum of Understanding (MoU) tali sa National Resilience Council (NRC), Carlos P. Romulo Foundation for Peace and Development (CPRF), SM Prime Holdings (SM) ug Xavier University alang sa subling pagpatuman sa “Adopt-A-City” initiative dinhi sa syudad.

Tumong sa maong (MoU) nga padayong mapalig-on ang kolaborasyon ug pagtambayayong sa pipila ka pribadong sektor sa pagpangita og mga science-based solutions dala sa mga katalagman o sa mga wala damhang panghitabo ug sa pagpatuman sa Sendai Framework for Disaster Risk Reduction 2015-2030.

Ang ordinansa nga gipalabang sa konseho alang sa maong katuyuan gipaluyohan sa komite sa Climate Change Adoptation and Mitigation and Risk Reduction ubos ni Konsehal Bernie Esparcia ug sa komite sa pamalaod ni Konsehal Edgar Cabanlas.