Pagpalambo sa pottery industry sa Bulua gisuportahan ni Goking

HUGOT nga gisuportahan ni Konsehal Geoge Goking, chairman sa Komite sa Ways and Means, ang mga gagmayng namuhunan sa syudad aron mapalambo ug ma-ila ang local nga produkto nga banga o’ kolon diha sa Barangay Bulua pinaagi sa paghangyo ug pagrekomendar sa Department of Trade and Industry (DTI) ug Department of Science and Technology (DOST) nga matagaan sa pundo alang sa maong katuyoan.

Kini ang gipaambit nga panahom ni Konsehal Goking atol sa sesyon niadtong Lunes nga gidumala ni Bise Mayor Bebot Rodriguez agig reaksyon sa special report ni Konsehal Girlie Balaba nga magpanday sa ordinansa nga mapreserba ang lokal nga produkto sa Brgy. Bulua nga mao ang banga o kolon.

Sumala ni Goking nga kamulo na ug proseso ang DTI ug DOST alang sa programa sa Micro Small Medium Enterprises.

Gani P3 milyones alang sa micro enterprises ug P10 milyones sa small ug P100 milyones alang sa medium enterprises ang gigahin nga pundo sa maong buhatan, sumpay sa Konsehal.

Malaumon ang konsehal nga mapatuman kini nga programa tungod kay daghan ang maka benipisyo ug makapahimulos lakip na ang dugang kinitaan sa atong mga kabus nga katawhan.

Niini gikalipay ni Konsehal George Goking ang maong taho ni Konsehal Balaba ug suportado niini ang maong tinguha nga matabangan ug maila ang mga local nga produkto nga ginama dinhi sa dakbayan.