Pagpalambo sa kinabuhi sa mga PDLs gihingusgan

HAYAN makabaton og kapanginabuhian ang mga Persons Deprived of Libety (PDLs) diha sa Cagayan de Oro City Jail-Male Dormitory.

Kini human gipalabang sa konseho sa syudad sa sesyon niadtong Lunes nga gidumala ni Bise Mayor Bebot Rodriguez ang ordinansa nga naghatag og katungod ni Mayor Rolando “Klarex” Uy pagpirma sa Memorandum of Understanding (MoU) tali sa FICCO Community Outreach Foundation, Inc. ug Cagayan de Oro City Jail –Male Dormitory alang sa kolaborasyon sa pagpatuman sa Community Based Livelihood Skill Training sa mga PDLs.

Si Konsehal Imee Moreno, chairman sa komite sa kooperatiba ug nagpaluyo sa gipalabang nga ordinansa, mibutyag nga ang kolaborasyon tali sa tulo ka partido maghatag og kaayuhan sa mga kwalipikadong PDL ug kahigayonan pinaagi sa ipahigayong matching skills training.

Sa maong MoU, ang dakbayan maoy magtanyag og skills training ngadto sa mga benepisaryong PDLs, mag-provide sa mga ekipo nga magamit atol sa ipahigayong hands-on skills training ug mag-abag dinha sa pagmonitor sa mga mogradwar ilabina sa mga kalihokan human sa pagbansay bansay.

Samtang ang Foundation maoy maghatag sa mga himan nga kinahanglan sa mga enrollees, magpagamit sa mga ekipo nga gikinahanglan alang sa hands-on training, maghatag og snacks ug meals sa matag enrollee ug moabag sa mogradwar sa training ug ang kadagkoan sa City Jail maoy mag-ila sa mga PDLs nga interesadong makakat-on og dugang kahanas.

Ang ordinansa nga gipalabang sa konseho alang sa maong katuyuan gipaluyuhan usab sa komite sa pamalaod ni Konsehal Ian Mark Nacaya. (JRGalano/SP)