Pagpakanaug sa EO 39 gidayeg

MALAUMON si Konsehal George Goking nga makatabang sa katawhan ang gipakanaug nga Executive Order (EO) 39 series of 2023 sa presidente sa nasud.

Kini ang panglantaw sa konsehal human gipasaka sa Konseho sa Syudad sa milabayng sesyon nga gidumala ni Bise Mayor Bebot Rodriguez ang Resolusyon No. 14697-2023 nga nagdayeg sa buhatan sa presidente sa pagpakanaug sa order nga nagpatuman sa price ceilings sa presyo sa bugas.

Mahinumduman nga si Goking una nang naghangyo sa nasudnong kagamhanan sa pagluwat og suggested retail price sa matag kilo sa bugas agig tubag sa padayong pagsaka sa presyo niini nga nakahatag og dugang kalisdanan sa katawhan.

“Ang bugas importante nga pagkaon sa matag Pilipino kay kini ang batakang panginahanglan sa tawo,” pasabot ni Goking, chairman sa Komite sa Trade and Commerce.

Niini, mapasalamaton ang konsehal sa maong lakang dala ang panghinaut nga mapatuman gayud kini paingon sa lokal nga mga mamaligyaay sa bugas.