Pagpahigayon sa 1st City Scholars’ Cup malampuson

KUSGANONG gipahalipayan ni Konsehal Suzette Magtajas-Daba, Chairman sa Komite sa Edukasyon, ang mga nagpasiugda sa unang Scholars’ Cup alang sa kapin nuebe mil ka nga Iskolar sa Dakbayan niadtong Enero 27-28, 2024 diha sa Misamis Oriental Integrated Sports Complex.

Ang Scholars’ Cup 2024 nagdala sa temang: Building Characters through Sports, ug gitinguha sa pagpasundayag sa disiplina sa mga iskolar diha sa pagdula sa nahan-ayng mga paugnat sa kusog. Ang mga iskolar misalmot sa dulang basketball, volleyball, mind games, e-games, mga larong Pinoy ug cheer chant competition.

Gipasalamatan ni Daba si Mayor Klarex Uy sa pagmugna sa maong indigay ubos sa pagdumala ni City Scholarships Office Head Richel Petalcurin-Dahay uban sa mga nagboluntaryo aron makab-ot ang kalamposan sa maong kalihokan ug mapasundayag sa matag iskolar ang ilang tagsa-tagsa ka potensyal ug hilig sa nahan-ay nga mga paugnat sa kusog ug uban pang dula.

Niini, gipahalipayan usab ni Daba ang tanang mananaog ug mga iskolar nga misalmot sa kalihokan nga gitambongan usab ni Konsehal John Kenneth Sacala.