Pagpahamtang og limitasyon sa dagkong trak angayan balansehon, Cabanlas

Angayang makonsidera ug balansehon ang tanan aspeto aron dili ma-apektuhan ang mga negosyante nga namuhonan og negosyo sa trucking kay gani ang uban niini giutang pa ug looy usab og dali-on ang maong lakang.

Kini ang reaksyon ni Konsehal Edgar Cabanlas, chairman sa komite sa urban and rural poor and housing development, sa taho ni Konsehal John Michael Seno mahitungod sa pagpahamtang og limitasyon sa gibug-aton sa mga dagkong trak nga moagi sa kadalanan sa kabarangayan sa syudad.

Sa sesyon sa konseho niadtong Lunes nga gidumala ni Bise Mayor Jocelyn Bebot Rodriguez, si Cabanlas miingon nga mas maayo nga obserbahan ang kalidad sa kadalanan sa syudad kay ang uban niini mga karaan na ug nipis usab ang pagtrabaho sa mga kontraktor.

Malaumon si Cabanlas nga matun-an pag-ayo ug dili dalion ang gisugyot nga lakang ug konsultahon ang tanan aron walay ma-apektohan ug ma-agrabyado sa maong lakang.