Pagpahalipay sa Kagay-anong grand winner sa GSIS nat’l painting contest gisugyot

Hatagan sa pagtagad sa Komite sa Turismo ni Konsehal Jay Pascual ang sugyot resolosyon ni Bise Mayor Bebot Rodriguez nga magpahalipay sa Kagay-anong grand winner sa GSIS National Painting Competition 2023.

Ang maong indigay gipahigayon niadtong Hunyo 16, 2023 sa GSIS Auditorium/Museum sa Pasay City ug nakuha ni Joseph Arao-Arao ang grand prize. Nasayran nga ang maong indigay tinuig nga gapasiugdahan sa Government Service Insurance System nga gasalmotan sa gatosan ka mga artists sa tibouk nasud.

Si Arao-Arao napili sa iyang masterpiece nga “Uno’s Gentle Warmth”. Usa siya sa 871 ka mga pintor nga misumete ug nagpakita sa ilang talento sa pagpinta.

Ang masterpiece ni Arao-Arao ngipasudayag diha sa GSIS Art Collection sa GSIS Museo ng Sining sa Pasay City hangtod sa Agosto 31, 2023.

Sa gidusong resolosyon sa bise mayor gipasabot nga dakong garbo sa dakbayan ang naangkong kalampusan ni Arao-Arao.